مناخيرك كبيرة: إذًا إنتي حامل في ولد!

بواسطة | سبتمبر 23, 2014
9008 مشاهدة | 0 التعليقات

مناخيرك كبيرة إذًا إنتي حامل في ولد
كم مرّة سمعتِ الجملة الوارد ذكرها في عنوان المقال وما شابهها من إفتكاسات الأمهات والحموات واﻷقارب واﻷصدقاء والبواب وبائع السوبرماركت؟!

حسنًا في البداية إليكِ هذا التحذير:

” العنوان والمضمون لا يمت للواقع والحقائق العلمية بصلة، وأي تشابه بينه وبين الواقع فهو محض صدفة (مقصودة) تمامًا”.

الحكاية عادة بتبدأ باﻵتي: خبر الحمل السعيد ثم مرور أول شهر بأمان وتزايد أعراض الحمل اللي غالبًا بتسبب إعياء وإرهاق وتغير في مظهرك مع الوقت.. ليبدأ الفتيّ العظيم لمعرفة نوع الجنين!

أشهر عبارات الفتيّ التي تتنبئ بنوع المولود (ولد ولا بنت):

“مناخير كبيرة ووشك وارم شوية.. يبقي لازم تكوني حامل في ولد، ليه؟ ﻹن الولد بيوحَش مامته!”
“إنتي كسلانة كدة ليه؟ على طول حاسة بالغثيان ونفسك غمّة عليكي؟ .. على فكرة إنتي حامل في بنت” (بغض النظر عن إنّ هي دي أعراض الحمل الطبيعية جدًا في الثلث اﻷول من الحمل لكن حماتك/والدتك أكيد لها رأي تاني)
“مالك..بشرتك بهتانة كدة ليه؟ هو الولد اللي عامل فيكي كدة! ” (متخيلة حماتك تقترب من بطنك وتهمس في أذنك قائلة -خلفة الولاد مش بالساهل-)
“الوحم على الحلويات يعني خلفة بنات و الحوادق صبيان” (اﻷسطورة بتقول كدة، لكن نفس اﻷسطورة بتقول إن جسمك في الحمل بتحصله تغيرات هرمونية بتأثر على رغبتك في اﻷكل وشهيتك تجاه بعض أنواع الطعام)
“خط البطن اﻷسمر أثناء الحمل، الخط الطويل يعني ولد والقصير لحد السرّة يعني الحمل في بنت” (شايفاكي ياللي بتبصي لبطنك)
“حجم بطنك صغير ونازلة لتحت شوية دليل على الحمل ببنت، والعكس صحيح”
” نمو شعر رجلك سريع يبقي الجنين ولد والعكس بنت” والسبب من وجهة نظر صاحب اﻷسطورة هو تأثير هرمون الذكورة على اﻷم! لكن الحقيقة إن جنينك اللي بحجم حباية الفاصوليا لايوجد لهرموناته تأثير على جسدك أبدًا.
” لون البول الغامق يعني مولودة بنت” .. الحقيقة إنّ لون البول الغامق يعني إنّ اﻷم لا تتناول القدر الكافي من السوائل أثناء الحمل!
لو كان حملك التاني أو التالت، هتلاقي اﻷم/الحماة بتفحص راس أخر أطفالك ﻹنها مقتنعة إن شكل منبت الشعر ببيحدد نوع الجنين. (ﻷ. دي أسطورة سحرية مالهاش أي تفسير)

في النهاية حتي وإن تشابه أي توقع سابق مع نوع جنينك فعلاً فلازم تتأكدي إنها صدفة مجردة! وعمومًا.. الانتظار حتي الشهر الخامس والذهاب للطبيب ﻹجراء السونار سيجعلكِ تتعرفين على نوع طفلك بمنتهي السهولة وبالتالي تقدري تشاركي اﻷقارب المتوقعين لنوع المولود بهذا الاختراع الرائع!

لو كان عندك تجربة لجملة سمعتيها كتير وقت حملك عن نوع المولود..شاركينا بيها!